ចង់អុំទូក ងូតទឹកជ្រោះ បោះតង់និងគយគន់ធម្មជាតិ សាកទៅលេង"ក្ដាតសាណាកា"ម្ដងមើល៍!
ការដើរលេងកម្សាន្តនៅកន្លែងធម្មជាតិដ៏ស្រស់បំព្រង ដែលមានព្រែកទឹកថ្លាឆ្វង់សម្រាប់អុំទូកលេង ងូតទឹកជ្រោះហូរធ្លាក់ពីលើភ្នំយ៉ាងត្រជាក់ គយគន់ទេសភាពដ៏ស្រស់ស្អាត ញ៉ាំអាហារសមុទ្រស្រស់ៗ និង គេងនៅក្នុងតង់អមដោយព្រៃកោងកាងប្រកបដោយផាសុកភាព គឺជាបំណងប្រាថ្នារបស់អ្នកទេសចរទាំងឡាយ។ បើលោកអ្នកចូលចិត្តការកម្សាន្តបែបធម្មជាតិដូចនេះ មានកន្លែងថ្មីមួយដែលអ្នកគួរតែសាកល្បងទៅលេង!
រមណីយដ្ឋានធម្មជាតិ ក្ដាតសាណាកា បង្កើតឡើងដោយសហគ្រិនវ័យក្មេងមួយរូប សម្រាប់ភ្ញៀវទេសចរ ដែលចូលចិត្តការដើរលេងកម្សាន្តបែបធម្មជាតិ ដែលមានខ្យល់បរិសុទ្ធ និងជាទីកន្លែងដ៏ស្រស់ស្អាត ស្ថិតនៅជើងភ្នំបូកគោ ក្នុងឃុំកោះតូច ស្រុកទឹកឈូ ខេត្តកំពត ចម្ងាយតែប្រមាណ ១៩គីឡូម៉ែត្រ ពីទីរួមខេត្តកំពត។
លោក អឿន រស់នៅអមរើន អ្នកអភិវឌ្ឍតំបន់ទេសចរណ៍ធម្មជាតិ Kdat Sanaka (ក្ដាត សាកាណា) ថ្លែងប្រាប់ ខេមបូណូមីស ថា នៅតំបន់ទេសចរណ៍ធម្មជាតិថ្មីបំផុតនេះ អ្នកទេសចរអាចរីករាយនឹងជម្រើសនៃការកម្សាន្តជាច្រើន ដូចជា អុំទូកកៃយ៉ាក់លេង ងូតទឹកជ្រោះ ឡើងភ្នំ មើលអំពិលអំពែក និងមានកន្លែងបោះតង់បែបធម្មជាតិដ៏មនោរម្យទៀតផង។
តាមពិតទៅ ភូមិ ក្ដាតសាណាកា ជាតំបន់ទេសភាពធម្មជាតិ ដែលសម្បូរព្រែក ព្រៃកោងកាង និងទឹកជ្រោះជាច្រើនកន្លែង ព្រមទាំងជាតំបន់ដែលសម្បូរអាហារសមុទ្រស្រស់ៗទៀតផង។
លោក រស់នៅអមរើន ដែលបានបញ្ចប់ការសិក្សាថ្នាក់បរិញ្ញាបត្រច្បាប់ ប៉ុន្តែ មានចំណូលចិត្តក្នុងការរកស៊ី បានបញ្ជាក់យ៉ាងដូច្នេះ៖ «មូលហេតុដែលខ្ញុំជ្រើសរើសភូមិនេះ មកធ្វើ Resort ព្រោះ ទីនេះ វាមានចម្ងាយជិតទីរួមខេត្តកំពត បើប្រៀបធៀបនឹងរមណីយដ្ឋានដទៃទៀត។ លើសពីនេះ ភូមិនេះ មានសក្ដានុពលច្រើន ដូចជា ព្រៃភ្នំ ទឹកជ្រោះជាច្រើនកន្លែង ព្រែក ព្រៃកោងកាង អាហារសមុទ្រ និងធនធានធម្មជាតិដទៃទៀត។ ហើយភ្ញៀវទេសចរ ដែលមកទីនេះ មានគ្រប់ប្រភេទ ប៉ុន្តែ ផ្តោតសំខាន់លើភ្ញៀវដែលចូលចិត្តធម្មជាតិ និងភាពស្ងប់ស្ងាត់»។
ដោយបោះទុនជាង ២០ម៉ឺនដុល្លារបង្កើតរមណីយដ្ឋានធម្មជាតិមួយនេះ បានធ្វើឲ្យលោក អឿន រស់នៅអមរើន មានមោទនភាពយ៉ាងខ្លាំង ដោយសារលោកបានសាងសង់ទីកន្លែងធម្មជាតិ ដែលអាចផ្តល់មុខរបរជាច្រើនដល់អ្នកភូមិ និងបានបង្កើតទីកន្លែងបែបធម្មជាតិ ផ្តល់សេវាកម្មទេសចរណ៍ក្នុងតម្លៃមួយសមរម្យជូនភ្ញៀវទេសចរជាតិ និងអន្តរជាតិ ដែលមកដល់ទឹកដីខេត្តភាគនិរតីមួយនេះ។
លោកបញ្ជាក់បែបនេះថា៖ «នៅទីនេះ យើងអាចគេងក្នុងតង់ក្នុងមួយយប់១២ដុល្លារ តែបើគេងក្នុងបន្ទប់ គឺមួយយប់ពី ១៥ ទៅ ២០ដុល្លារ។ កន្លែងយើង ទាំងកន្លែងស្នាក់នៅ សេវាកម្ម និងម្ហូបអាហារ គឺមានតម្លៃសមរម្យ»។
បើតាមគម្រោង ម្ចាស់រមណីយដ្ឋានធម្មជាតិរូបនេះ នឹងពង្រីកការសាងសង់និងកែច្នៃតំបន់នេះ ឲ្យកាន់តែមានភាពទាក់ទាញបន្ថែមទៀត សម្រាប់បម្រើដល់អ្នកទេសចរ ឲ្យបន្តគាំទ្រនិងមកលេងកម្សាន្តនៅទីនេះ ដើម្បីលើកកម្ពស់ទេសចរណ៍ក្នុងស្រុក បង្កើតការងារជូនពលរដ្ឋ និងថែរក្សាបរិស្ថាននៅកម្ពុជាផងដែរ៕
0 Comments
Post a Comment