ភ្នំគូលែន មានប្រាង្គប្រាសាទ បុរាណដ្ឋាន និងពើងធម្មជាតិជាង ៤០០កន្លែង ទេសភាពស្អាត ដូចក្នុងរឿងនិទាន
គូលែន ជាភ្នំដ៏ពិសិដ្ឋរបស់ប្រជាជាតិខ្មែរ តាំងពីបុរាណកាលរហូតដល់បច្ចុប្បន្ន ដោយសារនៅទីនោះជាទីបុរាណដ្ឋានប្រវត្តិសាស្ត្រ ពោរពេញ ដោយសម្បត្តិវប្បធម៌ សាសនា ធនធានធម្មជាតិ ច្រើនសម្បូរបែប ដែលភ្ញៀវទេសចរនិយមទៅទស្សនាជាប់ឥតដាច់ ប៉ុន្តែកន្លែងមួយចំនួនមិនទាន់មានភ្ញៀវទៅទស្សនាច្រើននៅឡើយទេ។
លោក ងិន សារុន បុគ្គលិកផ្នែកបុរាណវិទ្យានៃអាជ្ញាធរជាតិអប្សរា ត្រូវបានបានអ្នកសារព័ត៌មានដកស្រង់សំដីថា នៅលើភ្នំគូលែន បើរាប់ទាំងប្រាង្គប្រាសាទ បុរាណដ្ឋាន និងពើងធម្មជាតិមានប្រមាណជាង ៤០០កន្លែង ក្នុងនោះមានប្រាង្គប្រាសាទដែលត្រូវបានរកឃើញចំនួន ៤២ប្រាង្គ និងសង្ឃឹមថានឹងរកឃើញថ្មីៗទៀត តាមរយៈការប្រើប្រាស់បច្ចេកវិទ្យាឡាយដា (Lidar)។ មានន័យថា បច្ចុប្បន្ន អាជ្ញាធរមិនទាន់បានរកឃើញបុរាណដ្ឋាន និងប្រាង្គប្រាសាទ ដែលកប់ក្នុងស្រទាប់ដីនៃភ្នំគូលែនបានសព្វអស់នៅឡើយទេ។
យ៉ាងណាមិញ កន្លងមកទីកន្លែងដែលមានភ្ញៀវទេសចរទៅទស្សនាច្រើនជាងគេ មានដូចជា បរិវេណព្រះអង្គធំ ទឹកធ្លាក់ ក្បាលស្ពាន និងស្ទឹងលិង្គមួយពាន់។ដោយឡែក ទីដែលមានប្រាសាទបុរាណ ដូចជា ស្រះដំរី ប្រាសាទអូរផ្អុង ប្រាសាទអូរតូប ប្រាសាទអារាមរងចិន ប្រាសាទគគីរ និងប្រាសាទជាច្រើនទៀតនោះ ភ្ញៀវទេសចរមួយចំនួនធំមិនទាន់បានចូលទៅដល់នោះទេ។ លក្ខណៈពិសេសមួយទៀត នៅពេលទៅដល់ស្រះដំរី ភ្ញៀវទេសចរអាចគយគន់ទេសភាពទៅដល់ភ្នំបូក ភ្នំដី និងទិដ្ឋភាពក្រុងសៀមរាបពីចម្ងាយបានផងដែរ។
ក្រៅពីនេះ ភ្នំគូលែននៅមានពើងធម្មជាតិជាច្រើនទៀត ដូចជា ពើងតារដ្ឋ ពើងជ្រួញ ពើងគំនូរ ក៏ជាទីគយគន់ទេសភាពនៅតាមជើងភ្នំយ៉ាងស្រស់បំព្រង ប៉ុន្តែអ្វីដែលគេសង្កេតឃើញនាពេលកន្លងមក គឺភ្ញៀវទេសចរភាគច្រើន មិនទៅទស្សនា តាមរមណីយដ្ឋានទាំងនោះអស់ឡើយ៕
0 Comments
Post a Comment